मकवानपुर, कैलाश गाउँपालिका–५ स्थित बाघखोर डाँडाको एकान्त बस्तीमा सञ्चालित श्रीकृष्ण आधारभूत विद्यालयको खानेपानी स्रोतलाई लिएर उत्पन्न विवादले स्थानीय समुदायमा तनाव सिर्जना गरेको छ । विद्यालय व्यवस्थापन समितिका अध्यक्ष विष्णुकुमार थोकरमाथि केही दिनअघि आक्रमणसमेत भएको छ । उक्त घटनापछि शिक्षक, अभिभावक र विद्यार्थीहरू त्रसित बनेको विद्यालय पक्षले जनाएको छ ।

विद्यालय स्रोतका अनुसार विद्यालयले वर्षौंदेखि उपभोग गर्दै आएको खानेपानीको मुहानमा विगत एक वर्षदेखि विवाद हुँदै आएको थियो । विद्यालय पक्षको दाबीअनुसार उक्त पानी स्थानीय रूपमा स्थानीय कृष्ण कालीराजले एकलौटी प्रयोग गर्न थालेपछि भएको सामान्य विवादका क्रममा विद्यालय व्यवस्थापन समितिका अध्यक्ष थोकरमाथि आक्रमण भएको हो । घटनामा घाइते भएका थोकरलाई उपचारका लागि काठमाडौंस्थित नर्भिक अस्पताल लगिएको थियो । केही दिन उपचारपछि उनी अस्पतालबाट डिस्चार्ज भइसकेका छन् । घटनाबारे इलाका प्रहरी कार्यालय पालुङमा उजुरीसमेत दर्ता गरिएको बताइएको छ ।

थोकरले आफूमाथि कालीराजले सांघातिक आक्रामण गरेको बताए । विद्यालय पक्षले राष्ट्रिय स्वतन्त्र पार्टी (रास्वपा) का स्थानीय नेता कृष्ण कालीराजमाथि आक्रमण तथा धम्कीपूर्ण व्यवहार गरेको आरोप लगाएको छ । विद्यालय स्रोतका अनुसार विवादका क्रममा कालीराजले राजनीतिक पहुँचको आडमा आफूले जे पनि गर्न सक्ने भन्दै धम्की दिएको दाबी गरिएको छ । विद्यालयले प्रयोग गर्दै आएको खानेपानीमा अवरोध सिर्जना भएपछि विद्यार्थीहरू समेत स्वच्छ खानेपानीबाट वञ्चित हुनुपरेको विद्यालय प्रशासनको भनाइ छ । विद्यालयका प्रधानाध्यापक भक्ति लामिछानेले पनि आफूलाई विभिन्न किसिमका धम्की आएको बताएका छन् ।

विद्यालय प्रशासनका अनुसार घटनापछि सामाजिक सञ्जालमार्फत समेत त्रास फैलाउने गतिविधि भएको भन्दै त्यसले शैक्षिक वातावरणमा नकारात्मक असर पारेको छ । उनले सामाजिक सञ्जालमा बाँकीका सांसद खगेन्द्र सुनारसँगको फोटो राख्दै “…केन्द्रमा सत्यको पक्षमा बोलिरहने उहाँ, गाउँमा बोलिरहनेछु म । अब यात्रा सुरु भयो । पूरा फिल्म अब देखाउन त बाँकी नै छ ।” भनेर लेखेका छन् । स्थानीय अभिभावकहरूले विद्यालयको खानेपानी जस्तो संवेदनशील विषयमा देखिएको विवादले बालबालिकाको शिक्षा र स्वास्थ्यमा प्रत्यक्ष असर पारेको बताएका छन् । उनीहरूले घटनाको निष्पक्ष छानबिन गरी दोषीमाथि कानुनी कारबाही गर्न सम्बन्धित निकायसँग माग गरेका छन् । विद्यालय व्यवस्थापन समितिले विद्यालयको शैक्षिक वातावरण, विद्यार्थीहरूको सुरक्षाको प्रत्याभूति तथा खानेपानीको सहज व्यवस्थापन सुनिश्चित गर्न स्थानीय सरकार, प्रहरी प्रशासन र सरोकारवाला निकायको तत्काल ध्यानाकर्षण गराएको छ ।